Bu ilin ilk yarısında Azərbaycanda 61 hüquqi və fiziki şəxs tərəfindən balıq ovuna verilmiş 3 519 ton kvotaya qarşı faktiki olaraq 799 ton balıq ovlanıb.
Dövlət Statistika Komitəsindən verilən məlumata görə, ovlanmış balığın 30 tonu nərəkimilərin, 25 tonu kütüm, 558 tonu kilkə balıqlarının, qalanları isə xəşəm, kefal, dabanbalığı, çəki, sıf və digər balıq növlərinin payına düşür. Verilmiş kvota üzrə ödənilmiş məbləğin həcmi 53 min manat təşkil edib.
Qeyd edək ki, Azərbaycanda balıq ovu Azərbaycan Nazirlər Kabinetinin 23 iyun 2005-ci il tarixli qərarı ilə təsdiq edilmiş balıq və digər su bioloji resurslarından istifadə qaydalarına müvafiq olaraq aparılır.
Xatırladaq ki, İran Beynəlxalq Elmi Tədqiqat İnstitutu müəyyən edib ki, Xəzər dənizində nərə balıqlarının fəsiləsinin ehtiyatları 25-30% azalıb və əgər qanunsuz balıq ovu davam edərsə, artıq 13 ildən sonra Xəzərdə nərə balıqlarının fəsiləsinin ehtiyatları tamamilə tükə bilər.

/www.apa.az/